الاهالي يضربون ضابط الشرطة بعد حادثة القتل
حادثة ميدان الجزائر بالمعادي :
-
ضابط شرطة يطلق النار على سائق ميكروباص ويقتله
-
الاهالي في ميدان الجزائر وشارع النصر بالمعادي ينتقمون بضرب الضابط وحرق سيارته
مصريات
تعود تفاصيل حادثة مقتل سائق الميكروباص اليوم وحسب رواية شهود عيان بسبب خلاف على اولوية المرور بشارع الجزائر حيث جنح سائق ميكروباص نحو سيارة ملاكي فارهة ماركة “دودج أمريكي” يستقلها ضابط شرطة يجلس الى جانب السائق وقام ضابط الشرطة الذي كان جالسا بجوار السائق بسب سائق الميكروباص بأمه وأهله فاشتاط السائق غيظاً وأسرع لمعاتبة الضابط وقبل وصوله إليه أخرج الضابط طبنجة وفرد خرطوش وأطلق النار عليه فأصيب سائق الميكرو باص برصاصة في كتفه ناحية الصدر ولقي مصرعه.
وتطورت الاحداث اثر الحادثة تجمع الاهالي وسكان منطقة ميدان الجزائر بالمعادي حول الضابط وأمسكوه واستولوا على السلاحين الناريين والذخائر التي كانت بحوزته وتعدوا عليه بالضرب وأشعلوا النيران في سيارته وأصيب الضابط بجروح وكسور متفرقة وتم نقله في حالة خطرة إلي مستشفي النخيل ورفض استقباله فتم تحويله إلي مستشفى الشرطة.
ويروي احد معارف سائق الميكروباص بأنه جاء من كفر الشيخ للبحث عن لقمة العيش في االقاهرة وعمل سائقا على خط صقر قريش وفايدة كامل وأنه متزوج وله أطفال صغار ويقيم في شقة بسيطة بمنطقة فايدة كامل بدار السلام وأشار إلى أنه علم بالجريمة عقب صلاة الظهر بعد ما اتصل به أحد زملائه من السائقين وأخبره عن حادثة ميدان الجزائر بالمعادي ومقتل سائق ميكروباص على يد ضابط شرطة وفوجيء بتجمع آلاف المواطنين وسط ميدان الجزائر واشعلوا النيران بسيارات تابعة لجهاز الشرطة.
وتطورت احداث المعادي وسط ميدان الجزائر الى اثر الحادثة حيث تجمع أكثر من 5 آلاف مواطن ومواطنة من سكان المعادي ودار السلام والبساتين وسط الميدان وحملوا اللافتات والاعلام وطالبوا برحيل الحكومة المؤقتة وطالبوا بتغيير الوزراء وناشدوا رجال القوات المسلحة بعبارات مكتوب عليها” نطلب من وزير الداخلية أن يضخ دماء جديدة في الفترة القادمة لتكون الشرطة في خدمة الشعب”.
كما شهدت منطقة المعادي الجديدة احداث شغب وبلطجة علي نطاق واسع حيث قام البلطجية بإغلاق الشوارع الرئيسية بالمنطقة ومنعوا السيارات من المرور منذ الثانية ظهر أمس وأقاموا حواجز وموانع حديدية وسط الشوارع الرئيسية مثل شارع تسعة والنصر والقمر الصناعي وغيرها وأشعلوا النيران بجميع السيارات التابعة لجهاز الشرطة الموجودة بالمنطقة ووصل عدد السيارات المحترقة الى اكثر من 6 سيارات.
كما اشعل الأهالي النيران بإحدى السيارات التابعة لمديرية أمن القاهرة وكان يستقلها ضابط مباحث وعدد من أمناء الشرطة وتمكن الضابط من الهرب قبل ان يمسك به الأهالي وكذلك الأمناء بعدما أطلقوا الرصاص في الهواء وأضاف أحد السكان أن سيارة الضابط كان بداخلها ذخائر خرطوش بكميات كبيرة وكان هناك زجاجات ساعدت على سرعة اشتعال السيارة..
وأشار السكان والمتظاهرون بالميدان إلي أنهم يعلمون شقة اللواء اشرف السجيني والد الضابط المتهم بالقتل لكنهم لم يفكروا في اقتحامها لعلمهم أنه لا يوجد أحد داخلها سوى والدة الضابط فقط وأضاف السكان ان اللواء السجيني كان رئيس مباحث قسم البساتين منذ سنوات بعيدة وكان يعامل أهالي المنطقة بالقسوة وان ابنه مازال يتبع اسلوبه مع سكان المنطقة.
يوتيوب فيديو الحادثة و ومشهد حرق سيارة الضابط وضربه من قبل الاهالي
لابد من تغير جزري في جهاز الشرطة المواطن هو رجل الامن الاول في كل الاحوال ماحث اليوم ارجو ان يكون انظار اخير الي خهاز الشرطة في بلدى فعلينا ان نتكاتف لرقي بمصر الي الامام وليس العكس
صحيح اللي حصل ده شي مستفز بس مش كده ياجماعة وكان الضباط دول م اسرائيل لازم شوية انضباط وبعدين اغلب السائقين مش عايزين يكون في شرطة من اصله عشان يعملو كل الي عايزينه يقفو ا في نصف الطريق وياخد الاجرة بلطجه ويمشي عكس الطريق ويعاكس اي وحده السائقين مش مليكه ياجماعه واحنا عارفين وكذلك الضباط ولكن لابد من الانضباط حفاظا علي ارواح الناس الي في الشارع بنات واطفال وكبار
الشرطة لسة فكرة نفسها فى عهد الطاغية مبارك ؛ وللى فعلوة شباب فى ميدان المعادى قليل جدا
مش كل الشرطة مفترين في كتير مظلومين ودي اوامر شغلهم وحرام نظلمهم علشان دول اخواتان واولادنا
بالنسبة للا خت اللى بتقول انا شوفت بيقول للضابط تعالى امسحلى الجزمة وزعلانه اوىىى
على الضابط ما زعلتيش ليه لما كانو بيخدونا القسم ونلحس الجزم مش نمسح الجزم
الكلام ده حقيقى كان بيحصل ولا لاءه
مصر مش هتتغير الا لما الناس تغير ما فى انفسهم
بمعنى حب لاخيك ما تحب لنفسك
لايغير الله ما بقوم حتى يغيروا ما بانفسهم
خير الكلام ما قل ودل
العين بالعين والسن بالسن والبادئ اظلم
لو كان السواق غلطان فيستاهل
ولوكان الضابط غلطان يستاهل
كل واحد بياخد نصيبة
فرق شاسع بين الجميله لبني الاعلاميه في قناة الحياةالتي تتحدث بكل أدب وتواضع ودون تعالي علي المشاهدين وبين باقي الاعلامين ,فقد استضافت بعض من زملاء شهداء 25 يناير وبكل ادب وتواضع تحدث هؤلاء الشباب عن مستقبل مصر بدون اي اطماع في منصب او أحزاب
أما مليونيرات الاعلام امثال الاعلامي المليونير محمود سعد , والممثلة الاعلاميه المليونيره مني الشاذلي , والاعلامي المليونير ترافولتا وائل الابراشي, والفك المفترس الاعلامية الملونيره ريم ووووووغيرهم , فأنهم يثيرون الجماهير يوميالكي نظل في حالة فوضي الي الابد , واذا تم تلبية طلبات هذه الجماهير القله التي تمثل 1% من شعب مصر فسنجد ليس اسبوعيا تظاهرات بل يوميا , اتقوا الله يامتظاهرين وياأعلاميين, واتركونا نعمل بدونكم فأنتم تحرثون في الماء .
Pingback: حادثة ميدان الجزائر بالمعادي
الللى حصل مستفز فعلا بس يا ترى مستفز لمين بالضبط ما نفتكرشى أن السواق ملاك يعنى والا أن الضابط مش مجرم ويستاهل اللى يجراله – احنا دلوقتى ننظر الطار الذى أصبح بين سائقى الميكروباص والضباط وايضا طريقة السائقين بشكل عام -ده ميمنعشى أن الضابط مجرم لآنة عايز أن البلد دى بتاعه أبوه اللوا اللى كان مدورها فى المعادى كلها وكانت علاقته طيبة برجال المخدرات وما شابه وزى ما بنشوف فى الافلام وقت ما كان يقول عايز قضية يجيلة كبش الفدا أمال الناس مكبوتة من شوية
-السيد أشرف السجينى أحد حراسة كلبان بوليسيان كان اللى يضايقه يسيبة عليهم واللى ربى خير من اللى أشترى -أحب أقولك الان تجنى ما زرعتة بالأمس –ولك الله يا مصر
ولسى ياما هنشوف خلاص كل واحد بقى عاوز يعمل الى يخطر على باله بدون تفكير ياخسارة
ياجماعه مش لازم كل واحد فينا ياخد حقة بأدية لو اخطأ المواطن لازم الظابط ياخد اجرئاته اللازمة بالحق واذا اخطاء الظابط لازم المواطن مايسيب حقة لاكن بالقانون ياخد رقم سيارة الظابط ويعرف شكله ويسيبه ويروح اقرب مركز شرطه للابلاغ واذا لم يأخذ حقة يشوف مين اعلى من مركز الشرطة والاعلى فالاعلى حتى توصل الى النائب العام وبكدا كل واحد يحترم نفسة مش خلاص بقت سايبه
فى بعض من افراد الشرطة تعودوا على الاسلوب الواطى المستبد لعامة الشعب فهذا فى دمة لايغير الا بازاحتة من مكانة عن طريق المجلس الاعلى للقوات المسلحة او يتزاح بطريقتنا وهى بضرب الجزمة على فم رأسة
لامتةالشرطة حتسفز الناس واللهى يستاهلو اللى يجرالهم
يا جماعة انتو متأكدين اصلاً ان السائق معتداش على الضابط الاول حتى ولو بالاستفذاذ
بجد حاجة صعبة اوى لان ممكن تكون هناك تصفية حسابات خاصة بين الافراد وبعضهم
شاهدت بالأمس فيديو لضابط شرطه يقول فيه أن الشرطه هم أسياد الشعب هذا فجر و غير معقول و لن نسمح أن يكون لنا أسياد عصر العبيد انتهى و اليوم قتل سائق المكروباص و فى نفس الوقت الاعلام يطلب منا احترامهم هل من العدل احترامهم ؟ كلما ازدادوا فى عدم اعترافهم بغرور أنفسهم كلما زاد التعقد بين الشعب و الشرطه يا من يستطيع أن يقدم نداء الشعب للجهات المسؤوله كلنا نصرخ من معاملة الشرطه لناو اذا لم يتدخل أحد لكى يغير ذلك نحن قادرون كما غيرنا تاريخ مصر بأكملها نستطيع جزر رجل الشرطه الغير محترم و المغرور فى نفسه و على رأى المثل اللى مربهوش أبوه و أمه يربيه الشعب
السائق لسه عايش و لم يمت..و حالته مستقرة و الحمد لله..بينما حالة الضابط سيئة للغاية..ربنا يسترها معانا كلنا
يا جماعه انا اعرفه انها معادله صعبه بس الاصعب انك تكون فى مكان وانت عارف لو اتعرضت لسرقه او اى مكروه مش هتلقى شرطه امشى فى الشارع وانت مش هتحس بالامان اشكال غريبه جدا لم يكن لهم وجود ظهرت بكل الصور الشرطه لها اخطاء بس ايه الحل الناس كلها تعبانه من اسلوب سواق المكروباص والبلطجه معقول ده هيكون الحياه فى مصر البلطجى هو الكبير لازم نعطى للشرطه وقت وفرصه
حرام اللي بيجرا في مصر بجد ومحدش عارف مين الظالم ومين المظلوم وحتي لو متوصلش لكده خالص
السواق عايش وحالته تمام والضابط هو اللى تعبان. ثانيا ليه ماعملوش الصح ومسكوا الضابط وربطوه وسلموه للجيش هو اللى يتصرف معاه.ثالثا ليه الغل ده فى تكسير وحرق . خساره بجد احنا رجعنا للوراء كتير ولسه حتحصل بلاوى من الناس المغلولين وربنا يستر على اليلد دى .
ربنا يرحم كل الشهداء واى ظابط شرطة مش محترم هتكون دى نهاينة ان شاء اللة على فكرة انا كل يوم بسافر من يوم 28 يناير مشفتش ظابط شرطة ولا حتى امين شرطة موقفين العساكر وهما مستخبيين ودة اكبر دليل على رعبهم وتفاهتم و وساختهم الظابط المحترم اللى عارف نفسة محترم مش هيستخبى وحسبى اللة ونعم الوكيل فى كل مجرم انا اخويا علاء اصغر منى 24 سنة لسة متخرج ويدوب لسة مخلص الجيش كان عسكرى قوات جوية مصاب بقزيقة فى راسة عملتلة فقدان زاكرة ونزيف فى الازن اليسرى وكسر بالجمجمة من يوم 28 يناير لو انا اطول اى ظابط شرطة مش هيكفينى انى اكل من لحمة بسنانى وعلى راسهم حبيب العادلى ورمزى الشاعر حسبى اللة ونعم الوكيل فيهم كلهم
بعد السلام عليكم ورحمة الله وبركاته
،بالتأكيد لست مع الضابط اللى حاول قتل السائق ولا مع السائق اللى لا يحترم الطريق ولا القانون ممكن نرجع ليوم 24 يناير 2011 وما قبله عندما يمسك رجل الشرطة أو رجل آمن الدولة أى فرد من أفراد الشعب المصرى بتهمة أو بدون تهمة معارض أو سائق تاكسى أو متظاهر أو حرامى ممكن نتخيل المشهد أعتقد أنه نفس المشهد اللى حصل فى المعادى بس تكون الصورة معكوسة ، يعنى الشرطى هو المعتدى والمواطن هو المعتدى عليه ولكن الشرطى لايحرق السيارات ولا يقطع الطريق ولا يحاول أن يمسك أى حد ماشى فى الشارع لأنه من الشعب اللى كان مقهور ومذلول ومعارض للنظام الفاسد (السابق) ياجماعة الخير يا شعب مصر الوفى تحملنا الظلم سنوات طويلة والكل عارف طعمة ومرارته فبالله كفنا ظلم لآنفسنا ولغيرنا وكان من أهم شعار الثورة هو التغيير فلا نتعامل مع الأخريين بنفس الطريقة التى كان يعاملنا بها النظام السابق وأعتذر أن أقول با أكثر منه ظلماً لأننا نحرق ما نملكه من سيارات الشرطه وممتلكات جميع الشعب المصرى ،
الأخ اللى بيقول احنا مش فى غابه … لأ إحنا فى غابه مملؤه بكلاب الشرطه المسعوره وأصلا هم مجموعة فشله ثانويه عامه واللى أمه …… ؟ وإللى أبوه …….. ؟ وعامل فيها انه إبن ناس أو إبن زوات . أنا أعترف فعلا أنهم كلهم ولاد زوات بس وزات الأربع .. شوية مرتشن فاكرين أنهم إمتلكو الشعب .. وجزمة الحرامى فى الشعب أنضف من أشرف واحد فيهم … ,انا لو مش حرام لكنت أطالب بإبادة أفراد الشرطه واحد تلو الأخر . وبعدين العين بالعين والسن بالسن والبادىء أظلم وعلى الباغى تدور الدوائر .. وانا شخصيا لو تعرضى أى ضابط شرطه وحاول إهانتى وتجاهل حقى كإنسان … انا متأكد إنى 99% هقتله . لأنهم زودوها جدا . وأرجو ألا يفرط أى مخلوق فى حقه . عندما يعتدى عليه ظابط شرطه بوجه غير قانون فإذا نسى ضابط الشرطه القانون فليذهب هو والقانون للجحيم ونحتكم لقانون الغاب
نحن لسنا في غابة ولو كل واحد فكر ياخد حقة بأيدة تبقى مصيبة = ومن الممكن ان تكون حالة فردية ولكن يجب ان يتحد الشعب مع الحكومة ضد كل ما يخل بأمنها ومستقبلها لضمان مستقبل زاهر لمصر العروبة والشعب المصري
ما هو على أرض الواقع بين الشعب والشرطة صعب للغاية لأن وظيفة الشرطة تجعل من ضابط الشرطة بدون ما يشعر باشا . فلان بك وفلان باشا وألقاب إتلغت من زماااااااااااااان يا شرطيون من تواضع لله رفعه . والمشكله هى السلطة المفرطة بمعنى أن ضابط الشرطة بيقول فى قرار نفسه لو السائق ده جيبته القسم حمرمطه وأمسح بيه بلاط القسم ولو ضابط مرور حيقول والله مركبهاله تانى ولو أمن دوالله يا داااااااهيتى وهكذا فإن لم يراعى الله ويعرف أن الله هو القوى المتين وأن ما سيفعله من السهل على الله أن يسلط عليه من هو أقوى منه فيقتص منه . ثم أقترح وجود مندوب من القوات المسلحة برتبة مناسبة فى كل قسم وإن كان العدد غير كافى فيمكن الإستعانة بالضباط المتقاعدين حديثا من رتبة العقيد مثلا وربنا يولى من يصلح
iهى الناس دى مبتفهمش خلاص الشعب عارف قوتو قوتو فى حب مصر واى حد يخرج عن الصح يسب البلد يمش
يا جماعه كده ما ينفعش احنا كده بنخرب فى مصر مش بنعمر الظابط ضرب السواق فى قنون ياخد حقه مش الناس تعتدى ع الظابط كده مصر مش هيعود فيها امان وهنندم ع ال عمنه فى الثوره احنا شعب مصر العظيم ومينفعش بجد نعمل كده وربنا يهدى الجميع لصالح مصر ام الدنيا مع تحيات اخوكم محمد فوزى من مصر مقيم بسعوديه
حسبى اللة ونعم الوكيل ربنا ينتقم من كل ظالم قتل او سرق اوخرب فى بلدة وربنا ينتقم من حسنى مبارك لانة هوالسبب فى كل دة من الاول خلاهم يقوا علينا
ع فكرة السواق لس عايش وحالته الصحية احسن بكتير من الظابط تابعوا تطورات المواضيع ومتنشروش راى غير لما تتابعوا هو وصل لفين
والله ده كلام يزعل
وهيشوه صورة الثوره بتاعتنا كلنا ايوه احنا كنا بنكره الشرطه وبنطالب بتغير معاملتهم المستفزه والاستعباديه الى بيعملنا بيها بس محدش يقدر ينكر دورهم فى المجتمع ومينفعش نيهنهم هما برضه الى هيحمونا من العصابات والبلطجيه
حاجه تحزن
حسبى الله ونعم الوكيل دول برضوا مش عوزين البلد تبقى بلدنا هما فكرين ان البلد دى بلدهم واحنا عبيد ابوهم والله دمه حلال ولو فى عدل لابد من اعدامه شنقنا فى ميدان عام دى بلدنا ولينا فيها ذيهم بالظبط
مفيش فايدة الشرطة طول عمرها مش هتتغير العنتظه والغرور مليهم الا من رحم ربى ربنا يولى علينا من يصلح
لابد من الان وخصوصا هذا الوقت الحرج الذي تمر بة البلاد ان يحترم كل شخص نفسة ويحترم الاخرين سواء من الشرطة او من الشعب لان من النهاردة كل واحد هايعرف واجباتة وحدودة ومش هايسمح لاي حد يهينة او يقلل من كرامتة حتي لو هايخسر حياتة مقابل ذلك
Bad person make that action
الكلام ده كله تمام
بس الناس كمان ليها دور
احنا مش فى غابة
اى حد ياخد حقه بايده وبعدين هو كل حاجة نروح نحرق طيب والله امبارح فى الشارع واحد راح لظابط واقف قاله مش الشرطة فى خدمة الشعب ؟الظابط قاله ايوه راح الراجل قاله طيب تعالى امسحلى الجزمة ينفع كده؟
الحال لازم يتصلح من الطرفين
اللى حصل مستفز ولكن بعد الثورة لازم المفاهيم تتغير من الشرطة ومن المواطنين ومش لازم نستفز بعض لانة لايزال بعض الناس لم تستوعب الدرس لابد من السلام مع النفس اولا ثم مع الاخرين
يا جماعة ارجوكوا بالرغم من انا واحد من هؤلاء رجال الشرطة وانا رافض بشدة لهذه التصرفات الشاذة له او لغيره ، ولكن اقسملكوا بالله العلي العظيم ان في الكثير بل الأغلبية من ضباط الشرطة محترمين وبيخافوا من ربنا و ان المواطن ده ابويا أو اخويا أو شاب ربنا يحميه ، لا تجعلوا السيئة تعم ، ولا تنسوا الظروف النفسية اللي تحط فيها رجال الشرطة بوجه عام ولكن ليس مبرر لهذا الأجرام ، بس كل اللي أطلبه الصفح وافتكروا اي موقف طيب لهم ، وان مين غيرهم بيجبلك حقك لو عربيتك أو شقتك اتسرقت أو لا قدر الله ابنك اتخطف أو غيره ، معلش ارجوكوا نستحمل بعض ونخاف علي بعض علشان خاطر مصر واللي غلط يتحاسب وانا اول واحد اقطع رقابته مهما كان فاكر نفسه مين.
خلاص انتهى زمن اهانة الموطن المصرى ومن اليوم لن نكون كالنعام يضع راسه فى الرمل او المش بجانب الحائط سوف نقول كلمة حق مهما يحدث ولن نخاف سوى من الله سبحانه وتعالى وحسبى الله ونعم الوكيل فى الظالمين وكما قال احمد عرابى
لقد خلقنا الله احرارا
السلام عليكم ياريت كل افراد الشرطة تحترم نفسها كفاية مشاكل واللة العظيم تعامل افراد الجيش احسن بكتير من تعامل الشرطة ياريت الجيش يفضل معانا والشرطة مترجعش تانى اويتم الاشراف على الشرطة من قبل الجيش حسبى اللة ونعم الوكيل فى الشرطة وافرادها ياما ظلموا الشعب
من الحمق-لامؤاخذة- الاعتقاد بحسن معاملة الشرطة لنا كشعب محترم و عظيم تلقائيا بعد الثورة أو الاعتقاد بانهم قد ادركوا معنى ثورتنا و اننا نرفض -باصرار- و بوضوح اى محاولة للعودة للوراء و استمرار بقاء ما قد رفضه الشعب فى ثورته المجيدة!!!! فجهاز الشرطة المصرى الفاسد لا ينحصر فقط فى حبيب العدلى أو هذا اللواء أو ذاك بل يتعدى ذلك بكثير جدا لدرجة يمكن معها القول بان الغالبية منهم فاسدين و مجرمين فى حق الشعب المصرى بدرجات متفاوته و باشكال مختلفة مما لاتستوعبه الاف الملفات او الكثير من الدراسات و بناء على ذلك فانه يجب علينا كمصريين وطنيين نحب هذا الوطن فعلا ونخاف على ثورتنا من اذناب العهد البائد و الموجودة بيننا حتى الان ان نعمل على تطهير بلدنا من جميع اوجه الفساد و الظلم اللذان ابتليت بهما مصر فى السابق بشكل لايتصوره عقل مما انهك البلاد و نال من مكانتها الاقليمية و الدولية وهو يمثل فى حقيقته خيانة لمصر و عمالة مع اعداء الوطن مما يستلزم محاسبة كل المتسببين فى ذلك الان فى محاكمات عادلة ابتداء من الرئيس السابق حتى اصغر رجل شرطة ثبت تورطه فى جرائم ارتكبت فى حق مصر و شعبها الثائر الصابر الحر
اللةيرحم السائق وحسبى اللة ونعم الوكيل فشرطة
انا معاكى ياميرنا لازم الشرطة ترجع فى خدمة الشعب وليس العكس وكمان لازم الناس تفهم ان الحرية مش قلة ادب والسير عكس الاتجاه الحرية الحقيقية ان كل واحد فينا يحترم القانون ويحترم حق الاخرين
والله حرام اللى بيحصل ده كفايه تعذيب فى الناس
لازم صراحة يكون ده تصرف الشعب ظابط الشرطة المحترم على راسنا من فوق لكن أى ظابط يقل أدبه ياخد على دماغه ومن الناس مش هنشتكى تانى
لازم يعرفوا ان المواطن المصرى بعد الثوره خلاص مبقاش يتهز بصوت عالى ولا ضرب وان اللى هيتعرضله من الشرطه بقلم هيرده ولو شتيمه هيردها لان الخوف خلااااااااااص انتهى من يوم 25يناير وان احنا اقوى من اى حد واقوى من جهاز الشرطه نفسه واكيد ان شاء الله هيبقى فى سواسيه بين الناس والشرطه دول بنى ادمين زيينا ومايرضوش لنفسهم اللى بيعملوه ف الناس والدليل انهم لما قاموا بمظاهره محدش اتعرضلهم وشباب 25يناير لما قاموا بمظاهره اتهجموا لازم نعلم الشرطيين يعنى ايه أدميه لازم…
احنا لازم ف كل الاحوال نقول الحمد لله ف الواضح ان الشرطه هيا اللى لحد دلوقتى مش عايزه تحسن العلاقه بينها وبين الشعب وشكلها مش ناويه تغير اسلوبها فتستاهل كل اللى يجرلها وده يعتبر انذار لاى واحد من رجال الشرطه يفكر انه يأذى مواطن هيبقى ده مصييييييييره احسن عشان يتربوا ويعرفوا ان مبقاش فى حاجه اسمها سلطه ونفوذ
والله عمر البلد ماهينصلح حالها الا لو عرف كل واحد ماله وما عليه معقوله الوحشية تصل الي هذا الحد ظابط يمشي بمسدسه الميري ويضرب شخص لتعارضه معه في موقف ما وهذا الضابط اجازة وكيف يمشي بمسدسه وهو اجازه هل لارهاب الناس لابد من محاكمته ليكون عبره وهذا الذي حصل معه قليل جدا
ان هذا سخيف لكل عقل سليم ان كان سياسي او مفكّر او مواطن ان يسمي هذه الاعمال التخريبية ثورة، لا يوجد قاموس في علم الاخلاق يصف هذه الاعمال التخريبية، تدمير الممتلكات العامة و انجازات الشعب و امن الدولة، لا يوجد قاموس في علم الاخلاق يصف هذه الاعمال. في الشرق يسموها متمردين و في العراق قوات الاحتلال يسموهم ارهابيين و القاعدة و في اوروبا يسموهم مشاغبين و في الغرب يسموهم عصابات المافيا فلماذا في ليبيا و من قبل في تونس و مصر و في دول عربية يصفوا هذه الاعمال بانها ثورة.. الا ياتي على البال بان هذه سخافة و مؤامرة. اذا انتبهو يا اولى الالباب.
اصل ايوة رجل ظلم ناس كتير وابنة طتاع مفتري زي ابوة حسبنا الله ونعمه الوكيل
. نرجو سرعة تصحيح الخبر … السائق مازال حيا حيث أنه أصيب فى كتفه.. ورجاء الى كل الصحفيين الشرفاء.. ألا ينشروا إلا بعد التأكد من صحة الأخبار.. هناك وعى من الناس الآن.. والصحيفة أو ناشر الخبر الذى يثبت كذبه لن يقرأ له أحد بعد ذلك .. نرجو المصداقيه فى الأداء.. السائق حى ..والضابط حى .. ومع إحترامى لسائقى الميكروباص زكذلك أيضا لسائقى التوك توك إلا أن مفهوم الحريه عندهم ليس له سقف .. وكفى مانشاهده الآن من السير عكس الإتجاه .. ووجود التوك توك بميدان التحرير والمهندسين
اللي حصل مستفز جدا . يعني ايه ضابط شرطه يقتل سواق في الطريق … دا مؤشر خطير ان لسه برده في حاجات كتييير عايزه تتصلح و لازم الامن يعود لمصر في اقرب وقت …… و انا بستغرب او بسال ليه الامن ما عادش لمصر لحد دلوقتي ….. اكيد فيه خلل في حاجه و متقوليش اللله يكون في عون الجيش احنا عارفين كويس اوي دور الجيش و دور الشرررررطه .فين الشرطه اللي في خدمة الشعب يعني عيب اوي اللي بيحصل ده و برده عايزه اقول ان ازمة الثقه بين الشرطه و الشعب ما زالت قائمه و الثقه دي لابد ان تعود في اسرع و قت ممكن …