اخبار ابو الليف
خبر زواج نادر ابو الليف قريبا
ابو الليف : انا مليش منافسين دقني وشعري مش هحلقهم
مصريات
كتبت:هناء عبدالفتاح
بغض النظر عن الاختلاف في تقييم المطرب الشعبي ابو الليف وطبيعة كلمات أغانيه، فإنه بلاشك له قاعدة جماهيرية لايمكن تجاهلها.. كما لايمكن تجاهل الظروف الصعبة والمشاكل الحياتية التي صادفته.. ومع ذلك ظل متمسكا بحلمه مؤمنا بموهبته وبأن النجاح قادم لا محالة، محاولات كثيرة جداً له باءت بالفشل والأخيرة حولت ابو الليف الى حديث الشارع المصري والعربي وصعدت به لمستوى المنافسة الحقيقية وجعلته حالة مثيرة للجدل «ولوك» يستدعي الوقوف والتأمل.
ابو الليف غنى الكلمات العامية والأكثر شيوعاً بين الشباب فأصبح واحداً منهم رغم بلوغه الـ42 من عمره، في الحوار التالى يكشف سر دخوله القلوب «من غير واسطة» كما قال في أغنيته الشهيرة «تاكسي» سألناه بداية:
* عاندتك الظروف كثيراً، وبين يوم وليلة أصبح ابو الليف حديث الجماهير داخل مصر وخارجها ما السر وراء كل هذا في رأيك؟
ـ الله سبحانه وتعالى ومن بعده الشاعر أيمن بهجت قمر والملحن محمد يحيي والموزع توما، الناس دي وقفوا جنبي وساندوني وسبتلهم نفسي لأنهم أدرى مني بتفاصيل النجاح ودارسين السوق كويس وفعلا قدروا يقدموني بالشكل اللي يعلم مع الناس والحمد لله نجحت وربنا عوضني عن شقي السنين اللي فاتت.
* هل ترى أن الغناء باللغة العامية الدارجة يصل الى قلوب الناس أسرع؟
– أنا شايف إن الغنا اللي طالع من القلب هوه اللي بيوصل لقلوب الناس أسرع سواء كان عامياً أو عاطفياً أو دينياً أو حتى سياسياً.
* هناك نقد يوجه لك بأن ابو الليف يتاجر بظروف الفقر التي عاشها حيث تذكرها في كل مكان.. ما تعليقك؟
– مليش دعوة بأصحاب النفوس المريضة، أنا مش بطلع أتفشخر بظروف عز وغنى بل أحكي قصة كفاحي وصبرى وعزيمتي عشان أقول للشباب المطحونين اللي فقدوا الأمل في الحياة إن الأمل دايما موجود طول ما الواحد على وش الدنيا والصبر والإرادة والإصرار أهم سلاح لازم الواحد يتمسك به.. ومش فاهم إزاي في ناس بتفسر إني بتاجر بظروفي.. إيه الأمراض النفسية الغريبة دي؟
* هل ستغير «اللوك» الغريب في الفترة القادمة خاصة بعد أن تحقق لك هدف الظهور به ونجحت وفرضت نفسك؟
– لن أغيره فشعري وذقني على هذا الحال من زمان أوي ومقدرش أتصور إني حالقهم وبسببهم سموني أبوالليف لأني كنت بشوك أي حد ببوسه من صحابي.
* لماذا ذكرت تامر حسني ومحمد حماقي في أغنيتك «تاكسي»؟
– والله العظيم هية جت كده تامر وحماقي نجوم وأنا بحبهم وبحترمهم جدا ومقصدتش خالص إني أقلل منهم بس فعلا أنا بغني من تالتة ابتدائي وأنا راجل عندي 42 سنة يبقي لما أنا جيت أغني يمكن هما مكانوش اتولدوا أساسا ومش بس تامر وحماقي أنا بغني قبل ناس كتير بس هيه جت كده وخلاص.
* وماذا عن علاقتك بـ تامر حسني؟
– معرفوش ومفيش أي اتصال بينا على المستوى الشخصي لكن طبعا اعرفه على المستوى الفني وبحبه جدا.
* هل ستتجه للتمثيل في الفترة القادمة؟
– آه أنا فعلا هعمل فيلم سينمائي قريب ومسلسل لرمضان القادم وكمان هغني تتر مسلسل جديد.
* حدثني عن تفاصيل كل هذا؟
– لا يمكنني الكلام عن أي حاجة دلوقتي خالص بس كل اللي أقدر أقوله إني هعمل الفيلم في شركة ميلودي.
* هل ممكن أن نرى ابو الليف يقوم بحملة الدعاية الجديدة لشركة ميلودي؟
– ليه لأ.. الشغل مقدرش أقوله لأ.
* هل حصول ابو الليف على النجومية التي انتظرتها كثيرا يمكن أن يؤثر في تواضعك وبساطتك المبالغ فيها حاليا؟
– ربنا يعلى مراتبي ويوطي نفسي ويثبتني ويبعد عني شر المستخبي.
* وماذا عن مشروع زواج نادر ابو الليف المؤجل؟
– سوف اعلن خبر زواج نادر ابو الليف قريبا لأني خلاص الدنيا اتظبطت.
ربنا يوفقك يا ابو الليف يا مليف
واللهى يا بنى انا فرحت ان واحد غلبان مثلك هيبقه مليونير خلال ايام …بس رجاء حط أمامك الايام الهباب ومتتنططش على الغلابة اللى كنت واحد منهم….وربنا يوفقك ونشوفك مثل عمرو دياب بس من غير غرور ولا كبرياء…..عمك اسماعيل الوهيدى البورسعيدى