حمار شغل
كل واحد فينا حمار و قرد و كلب
مصريات
هشام مبارك
، قالت بنتي بانفعال: الإنسان مهما كبر يابابا ساعات بيحس انه محتاج يسمع حدوتة من حواديت زمان أحسن من الحواديت السخيفة اللي عايشين فيها ليل نهار ..
إنسان في حديقة الحيوان
(١) حواديت
ايه رأيك يابابا ترجع زي زمان تحكيلنا حدوتة قبل النوم؟! ، هكذا فاجأتني بنتي الكبيرة يثرب منذ يومين لدرجة اني ظللت انظر حولى معتقدا ان الآنسة كلمات آخر عنقود البنات وليست يثرب (أول فرحتي) هي صاحبة هذا الطلب الذي يبدو غريبا منها بعد ان دخلت الجامعة وأصبحت الآن في اعدادي صيدلة ، سألتها مندهشا: انتي يابوسي اللي عايزة حواديت ، أنا كنت فاكرك خلاص كبرتي على الحاجات دي ، فقالت: لا يابابا ، غلط وأكبر غلط ، الانسان مننا مهما كبر في العمر ساعات بيحس انه محتاج يسمع حدوتة من حواديت زمان ، حواديت قبل النوم يابابا هي اللي ممكن تعمل ليا ولاخواتي توازن مع الحواديت السخيفة والثقيلة اللي بنسمعها طول اليوم ، كل شوية الحكومة معيشانا في حدوتة أسخف من اللي قبليها وكل همها انها تشغلنا عن بلاويها ، أراهنك يابابا لو كان أي بلد في العالم مشغول بحدوتة انفلونزا الخنازير زي بلدنا ، ده حتى البلاد اللي انطلق منها الفيروس معدتش مشغولة بالحكاية زينا ، وقبل ان أرد عليها انضم لها شقيقاتها وأخذن يهتفن في نفس واحد: آه والنبي يابابا تحكيلنا حدوتة ، قلت: أمرى لله ، أنا النهاردة ممكن أحكيلكم حكاية أمنا الغولة!! ، فإذا بهن يصرخن: غولة ايه بس يابابا ، بنقول لحضرتك مش عايزين أي حكاية تفكرنا بالحكومة تقوم تقول أمنا الغولة؟!
(٢) حمار شغل
قلت محاولا تهدئة البنات: طيب خلاص خلاص ، أنا عندي حدوتة جميلة بعتها لي عدد كبير من القراء الأعزاء واعتقد انها ممكن تعجبكم ، قال الجميع: أوكي يابابا ، اتفضل احكي ، فاعتدلت في جلستي قائلا: كان ياما كان ياسادة ياكرام وما يحلي الكلام إلا بذكر النبي عليه الصلاة والسلام ، كان فيه جنينة عايش فيها حمار وكلب وقرد وانسان ، نظر البنات الى بعضهن نظرة استنكار لكني لم أدع لهن فرصة لطلب حدوتة أخرى حيث أكملت كلامي قائلا: رئيس مجلس ادارة الجنينة طلب في أول يوم عمل له ان يجتمع بالسكان الأربعة الذين اندهشوا من الأمر لكنهم جاءوا في الموعد المحدد للاجتماع حيث بدأ رئيس الجنينة موجها كلامه للحمار قائلا له: أنت حمار وحتفضل طول عمرك حمار تشتغل من طلوع الشمس لغاية الليل ، تشيل فوق ظهرك كل الأحمال الثقيلة وتاكل الشعير ومعندكش أي ذكاء وعمرك حيكون حوالى خمسين سنة ، فقال الحمار: موافق يافندم أكون حمارا طول عمري ، بس خمسين سنة كتير أوي ، أنا مش عايز أعيش أكتر من ٠٢ سنة!! فهز رئيس الجنينة رأسه موافقا وهو يقول: سندعو الله عز وجل ألا يطيل عمرك عن ٠٢ سنة.
(٣) صديق الإنسان
جاء الدور على الكلب الذي كان يجلس على يسار الحمار حيث قيل له: أنت كلب ابن كلب ، مهمتك حراسة بيوت البشر وأنت على فكرة من أحسن أصدقاء الانسان وعشان كده بتعيش على الفضلات اللي ممكن يتركها لك ، ايه رأيك تعيش ٠٣ سنة بحالها؟! فإذا بالكلب يحتج على الكلام قائلا: حيلك حيلك ، وليه ٠٣ سنة كفاية أوي ٥١ سنة ، فهز رئيس الجنينة رأسه وهو يشير الى السماء مؤكدا ان الدعاء لله عز وجل سيتركز على طلب الكلب بألا يعيش أكثر من ٥١ سنة ، ثم جاء الدور على القرد الذي قيل له: أما أنت ياعزيزي القرد فستظل عشرين سنة بحالها تتنطط من غصن لغصن وتعمل عجين الفلاحة ونوم العازب عشان الناس تضحك وتنبسط ، فقال القرد: معنديش أي مشكلة ، بس بصراحة عشرين سنة دي كتير أوي ، كفاية عليّ ٠١ سنين ، فأومأ رئيس مجلس الادارة بالموافقة ان يدعو الله بأن يقصف عمر القرد الى ٠١ سنوات فقط ، وأخيرا جاء الدور على الانسان الذي جلس وسط الحيوانات مزهوا بنفسه لأنه الوحيد المميز بينهم ، واسترق الجميع السمع ورئيس الجنينة يقول للانسان: أما أنت ياعزيزي الانسان فأنت المخلوق الأكثر ذكاء على وجه الأرض ، وذكاؤك ده حيكون سبب انك تقود باقي الحيوانات وتسيطر على العالم كله ، وايه رأيك يكون عمرك حوالى ٠٢ سنة؟! ، فإذا بالانسان يعلن احتجاجه قائلا: عشرين سنة ايه ياجدع أنت ، دول ماينفعوش ببصلة ، أنا عايز التلاتين سنة اللي اتنازل عنهم الحمار ومعاهم ٥١ سنة بتوع الكلب وعليهم العشر سنين اللي القرد مش عايزهم ، فقال له: أوكي ياعزيزي ، لك ما تريد ، سندعو الله سبحانه وتعالى أن يطيل في عمرك كما طلبت!!
(٤) فول سوداني
في هذه اللحظة كانت زوجتي قد انضمت إلينا حيث لاحظت انها تستمع مع البنات للحدوتة بإنصات شديد ، بينما لجأت أنا للصمت لحظة لأعرف مدى انصات البنات للحدوتة حيث صاح الجميع. بسرعة يابابا كمل الحدوتة ، فقلت مندهشا: الحدوتة خلصت يابنات على كده ، الانسان من ساعتها بيعيش عشرين سنة كانسان لغاية ما يتجوز وبعدين يعيش ٠٣ سنة زي الحمار يشتغل ويتعب من الصبح لغاية الليل من غير ما حد يقوله شكرا ، وبعد ما عياله يكبروا بيعيش في البيت ٥١ سنة زي الكلب ياخد باله من البيت ويأكل الفضلات اللي بتكون في التلاجة ، وبعدين يشيخ ويتقاعد ويكون عياله اتجوزوا بيعيش آخر ٠١ سنين زي القرد يتنقل من بيت لآخر ومن ابن لآخر ومن بنت لأخرى يعمل الخدع لاضحاك أحفاده وحفيداته ، فإذا بالمفعوصة وعود التي كانت آخر عنقود البنات قبل تشريف الآنسة كلمات ربتت على كتفي وهي تقول: حدوتة جميلة يابابا ، ثم همست في أذني قائلة: على فكرة يابابا ، ميكونش عندك أي هم ، أنا حاشترط على اللي يتجوزني انه دايما يدخل في البيت موز وفول سوداني ، هو أنا عندي حد أعز من حضرتك يابابا!!
هههههههههههاي