مرتضى منصور
مصريات
أكد المستشار مرتضى منصور إنه شخصية مثيرة للجدل بكل ما تعنيه الكلمة من واقع حواره الذي اجراه معه الاعلامي عمرو الليثي ، خلال استضافته في برنامج ” واحد من الناس ” مرتضى منصور لم يتردد في إعلان تأييده لترشيح جمال مبارك لرئاسة الجمهورية ولم يتردد أيضا في اعلان تعاطفه مع الاخوان المسلمين وشعوره بالمرارة مما يتعرضون له منذ عهد الرئيس جمال عبد الناصر وحتى الآن .
وهو يفاجئ الجميع ايضا حيث يقول أن الرئيس حسني مبارك من أبرز مشجعي نادي الزمالك .. عموما شهد الحوار عددا من الاعترافات والتصريحات الجريئة لمرتضى منصور في الحوار التالي :
ازمة شوبير ومرتضى منصور
* ما الذي فعلته مع أحمد شوبير في موضوع ال سي دي الجنسي ؟
– القضية بدأت بأن الاخ شوبير الل ي كان يطلع في القناة السادسة لابس بيجامة وبلوفر وماسك ميكروفون .
* مش عاوزين نغلط في حد مش موجود ..
– شوبير اللي بيطلع يقول اوعى تقارني بمرتضى منصو وكان يقول سيادة المستشار .. عايز اقول له أن أنا اصغر رئيس محكمة في مصر و أصغر مؤلف قانون ، رئيس أكبر نادي زي النادي الاهلي ،أنا عضو مجلس شعب قبله ، الفيفا قالت إن أكتر 3 مشهورين في تاريخ نادي الزمالك هم : حيدر باشا و حسن عامر و مرتضى منصور ، فالمقارنة لن تكون في صالح شوبير ، لأن ساعتها هايكون الموضوع زي ما تقارن البرازيل بفريق مركز شباب الترماي ، هو بيقول إني مش مستشار وبانتحل صفة مستشار ..طيب يا اخي لما أنا مش مستشار مع اني كنت رئيس محكمة ، أمال حضرتك اللي عملوا لك أوضة جنب أوضة سمير زاهر وقلت أنا مستشار اتحاد الكرة ، ثانيا من 22 يوليو 2008 من غير ما اعمل حاجة غير إني اخذت حكما بوقف انتخابات نادي الزمالك .ينفع يعمل 28 حلقة عشان يشتمني ؟ ويجيب ناس شغالين معاه من معدين وغيره عشان يعملوا مداخلات مصطنعة ويشتموني .
*هل تأكدت من ذلك ؟
– هناك تحقيقات في النيابة عن الموضوع ده ..ما ينفعش الكلام ده ..ماينفعش يكون الميكروفون والكاميرا لتصفية الحسابات .
* لماذا يفعل شوبير ذلك ؟
– لصالح ممدوح عباس .
* ولكن شوبير نفى أي علاقة له بممدوح عباس ؟
– شوبير ينفي زي ما هو عاوز ، ما هو شتم ممدوح عباس قبل كده ووأنا قلت له هذا الكلام وقلت له أنه اصبح مستشارا لممدوح عباس بعد ذلك مصر كلها عارفة علاقة شوبير و ممدوح عباس .. هل فيه قناة تشتم مواطن مصري 24 ساعة وتهد في حيله عشان ممدوح عباس ويطلع يقول في برنامج على احدى الفضائيات يقول اننا سجلنا مع مرتضى منصور .. وكله كذب طبعا ، لاني ممنوع من الظهور في قناة الحياة رغم اني بعثت برسائل كتير وانذارات قلت فيها يا جماعة انا من حقي ارد .
* هل طالبت باغلاق قناة الحياة ؟
– هذا صحيح والموضوع أمام القضاء والقاضي عندما يرى أن قناة تخصص بثها لشتم مواطن وللانتقام الشخصي وتخصص مداخلات للشتيمة إن أنا سافل و مجنون و جربوع وجربان ..ده كلام مايتقالش في قناة مترمة ومع ذلك بين شوبير ومرتضى منصور القانون .. المهم نرجع للموضوع لما تشوف وتسمع على موقع شوبير الرسمي وهو موقع عالمي مكالمة تليفونية أنا مش طرف فيها يبقى مش أنا اللي سجلتها ، هم اللي بيسجلوا لبعض هوا والبنت، ان أنا كذا وكذا ..كلام سافل لا يليق .
* في مكالمة تليفونية خاصة ؟
– أنا مليش دعوة المكالمة التليفونية بين هبة غريب و شوبير خاصة ولا عامة ، المهم إنها نزلت على موقع لأن العلنية هي إنها تنزل على موقع انترنت فيسمعها الجميع .
* هل سجلت المكالمة التليفونية بإذن من النيابة ؟ هل تأكدت أن الصوت هو صوت أحمد شوبير ؟
– هو صوت أحمد شوبير مليون في المية و اتحاد الاذاعة والتليفزيون فيه لجنة فنية هتاخد بصمة الصوت وتحدد صاحبها والنيابة هي اللي هتفصل إذا كان صوته أم لا .
* ماذا فعل شوبير في الازمة بين شوبير ومرتضى منصور ؟
– شوبير عمل 16 حلقة يقول ويعيد اني راجل مجنون وسافل وعندي جرب .
* لكني اجريت حوارا مع شوبير وكان حريصا في الكلام عنك ولم يخطئ في حقك ؟
– أنا عندي الحلقات وقدمتها للنيابة واذا دخلت على موقعه الرسمي سوف تجد اوراق مزورة ينسبها شوبير الى النيابة العامة انني تم فصلي من عمل لاني ضرت راقصة ، طبعا النيابة هتجيبه عشان يجيب لنا هذا الورق وهي طبعا قصص وهمية .
* تحدثت عن وجود اسطوانتين ، الاولى عليها مكالمة تليفونية بينه وبين محررة الصحفية هبة غريب التي كانت تعمل في جريدة الفجر ؟
– تمام و رئيس تحرير جريدة الفجر عادل حمودة فصلها من العمل و هبة غريب موجودة لو المكالمة متفبركة كانت ظهرت البنت وحكت .
* طيب في رأيك من سجل المكالمة التليفونية هبة غريب ام شوبير ؟
– عليك ان تسأل الاثنين ..و واضح أن في علاقة ما بين شوبير و هبة غريب .. لانك لما تسمع المكالمة هتلاقي كلام لا يليق بين رجل و بنت وعمال يشتم في ستات مصر ويقول بذاءات ويقول : هو أنا هاعمل كذا في ستات مصر وادفع فلوس كمان ؟ وشاطر شوبير يقعد في قناة الحياة يقول مواعظ عن شباب الاهلي و الالتراس ، وإذا كان الصوت الذي اذيع على مواقع الانترنت مش صوت شوبير ، يبقى أنا هاتحبس واتعرض للمحاكمة بتهمة البلاغ الكاذب والتزوير وازعاج السلطات ، وأنا داخل على عربية السجن ولابس البدلة الزرقا هاعتذر للكابتن احمد شوبير ، لكن لو الخبير قال انه صوت شوبير يبقى ليا طلب واحد ، ان شوبير يرجع طنطا ومايرجعش مصر تاني ، خليك في طنطا يا شوبير واهل البلد الجميلة دي هيحاسبوك هناك حساب عسير لانك ما قلتش الفاظا بذيئة بس لا وكداب كمان .
* لو افترضنا ان شوبير هو صاحب المكالمة التليفونية هل تتفق معي في أنه ليس من مصلحته بث المكالمة في الانترنت ؟
– جنون الشهرة وغرور المال يخليك تعمل أي حاجة ..هو نفسه في البرنامج بتاعه قال يا مرتضى منصور يا مشاهدين ادخلوا على الموقع بتاعي وشوفوا أنا قلت فيه ايه وبيتفاخر .
* هل تريد أن تقول أن شوبير هو من وضع المكالمة التليفونية على الانترنت ؟
– طبعا ، زي ما وضع شهادات مضروبة ان انا باهرش ومجنون وجربان .
* اسمح لي أقول لك أن الناس بتقول انه لا يوجد سي دي تاني ولا حاجة ؟
– تقصد اي واحد فيهم بتاع هبة غريب ولا لمياء ناصف .
* هما كم سي دي ؟
– واحد بتاع هبة غريبهي الصحفية اللي فيه كلام بذيء ، وواحد بتاع لمياء ناصف اللي قالت فيه انها بتتاجر في الهيروين مع شوبير ودخلوه مصر ..وهاخليك تسمع الاثنين عشان تعرف الحقيقة .
* انت اتهمت شوبير بانه يقوم بادخال المخدرات الى مصر وادخال عربيات مهربة وتطالب باقرار ذمة مالية له على اي اساس ؟
– انا كنت واضحا في بلاغي حين قلت اني تلقيت سي دي على مكتبي ، لقيت فيه سيدة بتقول انها زوجة احمد شوبير هي التي توجه له هذه الاتهامات وتعترف عليه وعلى نفسها بذلك ..انا مش طرف في سي دي لمياء ناصف كما انني لست طرف في ال سي دي الاول .
* هل الصوت في سي دي شوبير الثاني يخص شخصية حقيقية ؟
– ايوه ..واسمها لمياء ناصف .
* هل تعرفها ؟
– عمري ما قابلت لمياء ناصف .
* هل تأكدت من وجود شخصية حقيقية بهذا الاسم ؟
– نعم تأكدت و لمياء ناصف موجودة في القاهرة ولدينا محل اقامتها ..وقدمت بلاغا الى النيابة ضد شوبير وبه سي دي لمياء ناصف وكل البيانات التي كانت موجودة على الظرف ..الموضوع خطير يا جماعة ..مافيهوش هزار ،البلد لو فيها كده ، واحدة بتقول احنا دخلنا ادوية فاسدة ومخدرات ..احنا في كارثة .
* أليس من الممكن ان يكون هذا الكلام ملفقا للكابتن احمد شوبير بغرض الانتقام به ؟
– لو لاحظت في سي دي لمياء ناصف تقوم بالاعتراف على نفسها وعلى شوبير ،فلو كانت ماجرة ماكنتش هتعترف على نفسها ..واضح أن هناك خلافا ماليا بين شوبير و لمياء ناصف على صفقة غير مشروعة .
* الخلاف بين شوبير و لمياء ناصف على الرقم 112 الف دولار ؟
– اللي هم بتوع اخر صفقة وبتقول أنا هاروح لمرتضى منصور وهو محامي قوي وباشوفه في التليفزيون .
* ولماذا اختارتك لمياء ناصف ؟
– ما هي قالت لاني محامي قوي و شوبير بيخاف مني .
* هل قابلت لمياء ناصف ؟
– لم اقابلها ولا مرة .
* الم يكن عليك ان تتأكد هل لمياء ناصف حقيقية ام لا قبل ان تتوجه الى النائب العام ؟
– كان في عنوان على الظرف الذي يحتوي على سي دي لمياء ناصف ، وعملت تحريات وتأكدت وبلغت النائب العام وهو المفروض يجيب لمياء ناصف و رانيا الشاعر و وعد وبقية الاسماء اللي اتقالت في ال سي دي .
مرتضى منصور و قضية سوزان تميم
* قضية سوزان تميم قلت أن معك دليل براءة هشام طلعت مصطفى من قتل سوزان تميم ، فما هو هذا الدليل ؟
– أنا قلت واقعة محددة أن انا كنت محامي عادل معتوق ، الزوج رقم 2 لسوزان تميم و كان عامل لي توكيلا أنا و عاصم قنديل و الطباخ ، و عادل معتوق قال لي : أنا عاوز أخرج الست سوزان بره مصر ، لانها لو خرجت هاموتها ، دي ست اعتدت عليا رغم انها زوجتي ، وقالت ان انا شغال عندها واعتدوا عليا وحبسوني في مصر ومازلت مصرا على أن قاتل سوزان تميم هو عادل معتوق .
* وما رأيك ي قول البعض أن كلامك هذا كان يستهدف الانضمام الى فريق الدفاع عن هشام طلعت مصطفى بعد ما سمعت عن الملايين التي تدفع ؟
– طارق طلعت مصطفى صديقي وطلب مني أن اكون في القضية لكني رفضت وقلت له أفضل أن ادلي بشهادتي ولا تعنيني هذه الملايين ولو كانت تهمني كنت قبلت ادافع عن الجاسوس الاسرائيلي عزام عزام في حين أني بادافع عن نقابة المحامين و الشعب الفلسطيني مجانا .
* هل كنت تحب جمال عبد الناصر ؟
– أنا اتولدت قبل الثورة بشهر و6 ايام يوم موته مشيت من بيتي اللي هوا في شبرا الي بيت جمال عبد الناصر في منشية البكري وألفت عليه قصيدة اخدت عليها جائزة في اولى جامعة .
* كانت بتقول ايه القصيدة ؟
– أحقاً مات الزعيم ؟ أحقاً مات العظيم ؟ ..وكمالة كده لا اذكرها ولكن بعد كده عندما قرأت بعض الكتب التي صدرت حتى من المقربين من جمال عبد الناصر يعني سامي شرف ، عبدالله امام و صلاح نصر لم يعد يعجبني .
* لكن صلاح نصر لم يكن من المقربين من عبد الناصر لانه طلع كتب كانت تهاجم النظام الناصري وله اسبابه التي تحترم ؟
– – لا استطيع تقييم عبد الناصر الا في مواقف .. مثل تعذيبه للاخوان المسلمين .
* انت زعلت لما عبد الناصر عذب الاخوان ؟
– اكيد لما يعذب اي بني ءادم هزعل .
* وهل كان محقا برأيك في تعذيب الاخوان المسلمين ام لا ؟
– طبعا أنا قرأت كتبا عن الحاجة زينب الغزالي ، ازاي كانوا بيلبسوها بنطلون رجالي ، وازاي كانوا بيعذوبا هذه السيدة ، أنا ضد تعذيب أي بني ءادم أيا كان فكره .
* وما رأيك في الاخوان المسلمين الان ؟
– حتى الآن هناك صراع بين النظام و الاخوان المسلمين و بسبب الاخوان المسلمين هناك قانون طوارئ وهناك تعذيب و تزوير في الانتخابات .
* هل ترى أن الدولة تزور في الانتخابات وبتعمل قانون الطوارئ لانها خايفة من الاخوان المسلمين ؟
– بالضبط .
* هل الاخوان المسلمين بهذه القوة التي تجلعني أزور الحكم وأنهي مفهوم الحرية و الديمقراطية حتى لا يصلوا الى الحكم ؟
– الاخوان المسلمين منظمون وهم بيفكروني بالنمل ، طابور طويل عارفين بيعملوا ايه ، والكذب المنظم احسن من الصدق المنعكش ، عندهم التزامات لما يتقال لهم انتخبوا فلان ، يروحوا ينتخبوه ودور الاخوان الان اهم من دورهم في مجلس الشعب .
* تقصد الدور الاجتماعي ؟
– الدور الاخلاقي .. انت النهاردة صاحب دعوة .
* هل أنا محق في شعوري بأنك متعاطف مع الاخوان وتشعر بالمرارة ازاء ما يحدث لهم منذ عهد عبد الناصر وحتى اليوم ؟
– أنا اشعر بالمرارة مما حدث للاخوان واليساريين ، عبد الستار طويلة و مفيد فوزي من الصحفيين في العصر الناصري ، اللي كان بيتكلم كان بيروح باتا ، ما ينفعش الكلام ده .
* ومازعلتش من اعتقالات سبتمبر 1981 ؟
– لما تيجي النهاردة وتقول ان مرتضى منصور بيؤيد نظام حسني مبارك ليه ؟ ..فيه ناس النهاردة بتشتم مبارك و جمال مبارك في الصحف كل يوم ، وانت عارف الدستور وغيره ، لو الكلام ده كان موجود في عهد عبد الناصر كان فيه مادة كاوية وناس ما بتطلعش من السجن تاني ، لكن أنا مش عايز أقيم النظام الناصري في التعذيب والمصادرة أو في الحراسات ومذبحة القضاة ، فيه مميزات وعيوب ، التاريخ قال كده ، عندك تأميم قناة السويس و السد العالي و حقوق العمال .
* هل تؤيد ترشيح جمال عبد الناصر للرئاسة ؟
– وهل هذا حرام ؟ ليس حراما دينيا ولا سياسيا .
* انا أسأل هل تؤيد جمال مبارك ؟
– كيف أتحدث عن هدم عمارة وبناء عمارة جديدة ، رغم ان العمارة قائمة والرئيس حسني مبارك موجود !
* انا اسألك في حالة ما اذا قرر الرئيس مبارك عدم دخول الانتخابات هل تؤيد جمال مبارك ؟
– الاجابة واضحة مين هاينزل امام جمال مبارك ؟ انت عاوز تبيع سمك في مية ؟ مين اللي هاينافس ؟ انا وقتها اقيم المرشحين واختار ، ولو جمال مبارك رشح نفسه بعيدا عن الناس اللي حواليه ومنهم احمد عز هانتخبه .
* وما مشكلة احمد عز ؟
– فيه ناس بتنتقص من رصيدك .
* هل تقصد أن احمد عز يؤثر سلبيا على جمال مبارك ؟
– نعم لان الناس مش حابة احمد عز ، خلينا نتكلم بصراحة ، طيب ما هو فيه محمد كمال و ماجد الشربيني ، لكن الناس مش حابة احمد عز .
* هل لأن احمد عز رجل اعمال ومحتكر الحديد وفيه انطباعات سلبية عنه في الشارع المصري ؟
– احيانا رجل الاعمال يكون سياسيا .
* طيب ما سبب تحفظك على احمد عز ؟
– الشارع المصري هو الذي يتحفظ و احمد عز كان بييجي المكتب عندي في الدقي .
* أنا اسأل عن رأي مرتضى منصور ؟
– يمكن أكتر حاجة أنا متحفظ عليها في احمد عز هو اسلوب تعامله مع اعضاء مجلس الشعب .
* الست متحفظا على كونه رجل اعمال ومحتكر السوق ؟
– شوف اذا كان احمد عز بيدفع ضرايبه و اذا كان احمد عز محتكر الحديد ففيه ناس محتكرة حاجات تانية .
* مثل من ؟
– محتكرون اسمنت و اجهزة كهربائية .
* طيب انا هاذكر 7 اسماء وأريدك أن تختار منها رئيسا للجمهورية : محمد البرادعي ، أحمد زويل ، عمرو موسى ، حمدين صباحي ، سامح عاشور ، جمال مبارك ، محمد مهدي عاكف مرشد الاخوان .. تختار مين ؟
– محمد مهدي عاكف .
* ياسلام ؟!
– طبعا احمد زويل و محمد البرادعي علماء ، ومش كل عالم ينفع رئيسا للجمهورية ، وخبرتهم السياسية ايه ، وماعتقدش انهم هينزلوا الانتخابات ، ومع احترامي للسيد سامح عاشور ، ده راجل سقط في انتخابات نقابة المحامين ، حمدين الصباحي صديقي العزيز .
* مرتضى منصور هايختار مين بعيدا عن تحليل شخصية كل واحد ؟
– جمال مبارك .
* هل علاقاتك هي سبب الاحتفاء بك في التليفزيون المصري فور الافراج عنك من السجن .
– فيه علاقات انسانية بيني وبين مسئولين كتير .
* كلهم زملكاوية ؟
– ماعدا احمد شفيق و يوسف بطرس غالي .
* وسيادة الرئيس ؟
– كان فيه مرة ماتش الزمالك بيلعب في نهائي افريقيا بره ، كنت عضو مجلس ادارة نادي الزمالك ، وكان المرحوم الفنان يونس شلبي موجود معانا وكان زملكاوي ، الزملك فاز والتليفزيون المصري كان بيسجل معايا فيونس شلبي كل شوية يقولي اشكر سيادة الرئيس ، فقلت على الهواء وبشكر سيادة الرئيس لانه زملكاوي هو واولاده ، والسيد جمال مبارك عمل لنا حفلة بعد ما رجعنا .
* الرئيس زملكاوي ؟
– جمال مبارك قالي لي : كيف عرفت ان الرئيس زملكاوي ، قلت له انا متأكد انك وعلاء اسماعلاوية ومتأكد ان الرئيس زملكاوي ، وما تسألنيش انا عرفت ازاي ان الرئيس زملكاوي .طين