مصريات – اخبار الموضة والجمال تكتبها ساندي شاهين: اجدد الوان المكياج الناعم السنة دي، واللي نصح بيها خبراء التجميل هي الالوان اللي متاخدة من الطبيعة، زي البرتقالي من الشمس والازرق بدرجاته من البحر، واللون الاخضر من لون الزروع، وآخر حاجة النبيتي والبيج والنحاسي من الوان الارض.
وطبيعة الجو الترابي في العالم العربي عمومًا، ومصر خصوصًا، بتفرض على المرأة انها تستخدم الالوان الارضية زي البيج و الروز والسيمون وغيرها من الالوان، لكن المطلوب ان المرأة تختار اللي يناسب بشرتها سواء للبشرة السمراء بانواعها الداكنة والحنطية والفاتحة، وكذلك لذوات البشرة البيضاء ولذوات البشرة الدهنية عامة.
* نصائح مكياج صيف ناعم للبنات
ودي نصائح للبنات لاستخدام مكياج الصيف الناعم واختياره بشكل سليم:
مكياج صيف ناعم للبنات
– استخدمي كريم اساس من نفس لون بشرتك ومفيش داعي تختاري لون افتح بالذات، لان حرارة الشمس في الصيف والعرق ممكن تشيل جزء من كريم الاساس لو مسحتي بشرتك بمنديل، ووقتها هيبان لون البشرة الحقيقي.
– استخدمي الكريم المخصص لعلاج الهالات السوداء، وبلاش تحطي اي كريم تاني لان المنطقة دي من البشرة بتكون حساسة.
– استخدمي درجة لون واحدة من البودرة المضغوطة الشفافة تحت العين والوجه كله، وبعدين شيلي اي زيادات بفرشاة كبيرة.
– استخدمي نفس البودرة اللي استخدميها وانتي بتحطي البودرة لاحمر الخدود،
– الوان احمر الخدود السنة دي هي اللون الخوخي، والبشرة الفاتحة انسب حاجة ليها الروز.
* مكياج العين
مكياج صيف ناعم
اول حاجة ابدئي باللون الفاتح تحت الحواجب اختاري الابيض او بيج فاتح جدا او رمادي وبعدين حطي لون واحد للجفن، والافضل انه يكون من نفس لون البشرة زي الخوخي مثلًا للبشرة الخمرية، أما البشرة الفاتحة فالانسب ليها اللون البرتقالي الغامق او النبيتيـ و بالنسبة لو خارجة بالليل او للسهرات عمومًا الاحسن تستخدمي ظل جفون لونه اسود.
– اختاري الماسكارا السميكة لان الماسكارا الخفيفة مش بتثبت كتير.
– ما تفتحيش الماسكارا و تعرضيها وقت طويل للهوا لان ده ممكن يتلفها.
– الماسكارا البني مخصصة للشقراوات اللي بتكون رموشهم فاتحة.
– لو كنتي بتحبي تحطي الكحل، فممكن تغيري الكحل الاسود للالوان الزاهية والاخضر هيديكي شكل احلى، و اختاري قلم الكحل الطري عشان متأذيش العين.
– ممكن تستخدمي الفرشاة الخاصة بالحواجب عشان تخفي الفراغات ما بينها بظل جفون من اللون البني.
وبلاش تستخدمي اللون الاسود للحواجب وكمان لازم تسرحيها لاعلى بفرشة الحواجب.
* إختيار أحمر الشفاه
اختاري درجة فاتحة الصبح ودرجة غامقة من لو نازلة بالليل، وموضة الصيف ده الاحمر والفوشيا اللي متاخدة من الوان الزهور، وخففي درجة اللون بمنديل ورق.
ويفضل انك تشمي لون احمر الشفاه قبل ما تشتريه ولو ما عجبتكيش بلاش منه.
* طريقة حفظ مستحضرات التجميل
حطي مستحضرات التجميل اللي انت مش بتستخدميها يوميًا في التلاجة، بالذات في فصل الصيف، وبكده تحافظي عليه اطول وقت ممكن، لان معظمها من المواد الطبيية اللي بتتعرض للتلف بشكل اسرع.
* الكريم الواقي من اشعة الشمس وشرب الماء
اخيرا لازم ما تنسيش تحطي كريم واقي من اشعة الشمس و اختاري اللي درجة حمايته عالية قبل ما تطلعي من البيت بحوالي 20 دقيقة و كتري من شرب المية لانها بتحافظ على نضارة البشرة.